رێڤەبەریا مە ل ساڵا (2008) بوویە رێڤەبەریا ئاڤا دەوروبەرێن پارێزگەھا دھۆكێ سەر ب وەزارەتا شارەوانی و گەشتوگوزاریڤە، ھەموو ھەوڵ دایە لدووڤ ستاندەرێن زانستی ئاڤا ڤەخارنێ لگورەی پێتڤیا ھەڤوەڵاتیان ل ھەموو قەزا و ناحیا و گوندان دابین بكەت، ھەروەسا رێڤەبەریا مە كارێ سەخبيریا پڕۆژەێن ئاڤا ڤەخارنێ و تۆڕێن ئاڤێ ل سنوورێ رێڤەبەریا مە ئەنجام ددەت، پتر ژ (90%) ژ ھەڤوەڵاتیێن سنوورێ رێڤەبەریا مە مفادارن ژ تۆڕێن ئاڤا ڤەخارنێ، ئەم ھەوڵ ددەین ئەڤ رێژەیە بھێتە زێدەكرن.
سنوورێ چالاكیێن رێڤەبەریا مە چار قەزایان بخۆڤە دگریت (سێمێل، ئامێدی، شێخان، بەردەرەش) و ھەموو گوند و كۆمەڵگەھێن دەوروبەرێن سنوورێ وان قەزایان و دگەل چەندین كەمپەیێن ئاوارەیان.
رێڤەبەریێ بزاڤكریە مفا ژ ئاڤا سەر ئەردى بھێتە وەرگرتن و پڕۆژەیێن ستتراتیجی یێن ئاڤێ بۆ ھەموو قەزایێن دھۆكێ دانیت، بۆ نموونە ل قەزا ئامێدیێ مەزنترین پڕۆژەیێ ئاڤا ڤەخارنێ ھاتیە ئەنجامدان، بەرھەمێ ئاڤا ڤی پڕۆژەی (2400) مەترێن سێ جانە د ئێك دەمژمێردا.
قەزا سێمێلێ دەسپێدكەت ژ سەنتەرێ قەزایێ و سەنتەرێ ناحیا باتێلێ و (21) كۆمەڵگەھ و (88) گوند و (4) كەمپێن ئاوارەیان كو ھەژمارا وان دبنە (133727) كەس.
سەبارەت ھۆبا قەزا شێخان، (15500) بەژدار ھەنە دگەل (200) ھزار كەسێن مفادارن كو د بەڵاڤەنە لسەر (155) گوند و (5) ناحیە و (2) كۆمەڵگەھان.
سەبارەت ناوچا فەیدیێ، مە ھوبا ئاڤا ناحیا فەیدیێ ل دەڤەرێ ھەیە، پڕۆژەكێ ئاڤێ یێ ئستتراتیجی بۆ ڤێ ناحیێ دھێتە ئەنجامدان، ھەژمارا ئەو كەسێن مفادار ژ ئاڤێ ل ھوبا ئاڤا ناحیا فەیدیێ دبنە (250) ھزار كەس كو (150) ھزار ھەڤوەڵاتینە ئاكنجیێن سنوورێ ناوچا فەیدیێنە.
ھوبا ئاڤا قەزا بەردەرەش، رادبیت ب دابینكرنا ئاڤێ بۆ (35) ھزار كەسان ل سەنتەرێ قەزایێ و (10) ھزار كەسان ل ناحیا رۆڤیا و (6) ھزار كەسان ل ناحیا دارەتوو و نێزیكێ (70) ھزار كەسان ل (84) گوندان، دگەل شارەوانیا بەنێنان.
ھوبا ئاڤا ناحیا كەلەك، ژێدەرێ سەرەكی یێ ئاڤا ڤەخارنێ بەرھەم دئینیت بۆ ھەڤوەڵاتیان پڕۆژەیێ ئاڤا ناحیا كەلەكێ یە دكەڤیتە لسەر رووبارێ (زیێ) مەزن، كو شیان ھەنە د ھەر دەمژمێرەكێدا رێژەیا (480)م3 یا ئاڤا ڤەخانێ دابین بكەت، ژێدەرێ دیتر یێ ئاڤا ڤەخارنێ دابین دكەت بۆ ناحیا كەلەكێ پێكدئێت ژ (4) بیرێن ئاڤێ، ھەر ئێك ژ وان بیران رێژەیا (40)م3 د ئێك دەمژمێردا ئاڤا ڤەخارنێ دابین دكەت دگەل پڕۆژەیێ ئاڤا كەلەكێ بۆ (2115) بەژدارێن ئاڤێ ل سەنتەرێ ناحیا كەلەكێ.
ھوبا ئاڤا ناحیا سەرسنگی، ژ (3) ناحیان پێكدئێت (سەرسنگ، بامەرنێ، چەمانكێ)، ھەر ناحیەك ژ وانە چەندین گوند ب سەرڤەنە، ژێدەرێ ئاڤێ ڤەخارنێ ل وان ناحیان لسەر ئاڤا بیر و كانیكانە.
بۆ زانین، رێڤەبەریا مە رادبیت ب دابینكرنا ھەموو پێتڤیێن پەیداكرنا ئاڤا ڤەخارنێ دگەل چارەسەركرن و سەخبيریكرنا ھەموو پڕۆژەیێن ئاڤێ.
ل دوماھیێ، رێڤەبەریا مە شیایە ب شێوەیێن زانستی ئاڤا ڤەخارنێ لدووڤ ستاندەرێن جیھانێ ب گەھینیتە (4) قەزایان و پتر ژ (746) گوندان و پتر ژ (11) ناحیە و (26) كۆمەڵگەھ و (9) كەمپێن ئاوارەیان، و ئاڤ دگەھیتە پتر ژ (956) ھزار كەسێن مفادارن، و پتر ژ (57700) بەژداران.
